(قيم الركاع من ديرة عفج)




هذا مثل يقولون إنه كان اكو فد ركاع امور شغلة تعبانة فراح لقرية اسمها عفج بلكي يتحسن شغلة ويجوه معاميل بس ورة ما استقر هناك اكتشف انه الناس هناك اصلا تمشي حفاي وميحتاجون ركاع فقال مستهزءاً
(قيم -اي حاز على نقود كثيرة- الركاع من ديرة عفج)

(قيم الركاع من ديرة عفج) هو عنوان قصيدة..يقال ان ناظمها هو ملا عبود الكرخي فيما ينسبها آخرون الى الحاج زاير..وكلاهما شاعر شعبي معروف..ولها قصة خلاصتها ان عامل احذية جاء قبل اكثر من مئة سنة الى قضاء عفك وفتح له محلا لتصليح الاحذية (والنعل).وفي الحكاية روايتان: الاولى تقول..ان معظم اهل عفك كانوا حفاة..وكان العامل يقضي يومه دون ان يأتيه أحد..فتعرض الى خسارة وغلق محله وعاد من حيث أتى.والثانية تقول :ان الذي يأتيه ليصلح حذاءه او نعاله يقول له:بروح ابوك ما اتدك بسماراهنا..وبعد ان يدقه يقول له بارك الله بيك..مع السلامة..وهكذا كان..كل من يأتيه يبدأها بروح ابوك..رحمة لوالديك..فد بسمار..فد خيط اهنا..وشكرا مع السلامة دون ان يدفع له شيئا..ولما شاف القضية مالها نهاية..هز يده وقال:قيم الركاع من ديرة عفج..فذهب قوله هذا مثلا عراقيا يضرب على من ينطبق عليه الحال.

وينسب الى عبود الكرخي، او الحاج زاير، انه جعل من هذا القول عنوان قصيدة سياسية نقتطف منها ثلاثة مقاطع تنطبق على الوضع الحالي..ان صح انه ناظمها، لأن بين الزمنين اكثر من سبعين سنة:


قيم الرگاع من هاي اللحه
إتشوفه هيبه وعنده لحيه إمسرحه
يشتم إبلا خجل وبلا مستحه
من يحس المقعد إشويه إندحچ
قيم الرگاع من ديرة عفچ
برلمان أهل المحابس والمدس
عگب ماچانوا يدورون الفلس
هسه هم يرتشي وهم يختلس
ولو نقص من راتبه سنت إنعقچ
قيم الرگاع من ديرة عفچ
إتشوف واحدهم إمعگل بالوقار
وبالأصل تاريخه أسود كله عار
إبضرف ثلث إسنين مليونير صار
إيريد عالوادم إيعبرله چلچ
قيم الرگاع من ديرة عفچ
گمت ما اعرف حماها إمن الرجل
ياهو التگضه إهو إيمثل العدل
وگمنه نستورد الشلغم والفجل
لأن كلها ضلت إتدور ودچ
قيم الرگاع من ديرة عفچ
والله ضيعنه الصدگ من الچذب
إتشوفه هيبه وحچيه المصفط عذب
ياخذك وإيردك إبشرق وغرب
وبسچاچينه يدچك حيل دچ
قيم الرگاع من د يرة عفچ
حيل دوخني الحچي الماله ربط
وصار عندي سكر وحصبه وضغط
نفترش عاگول ونتغطه ابحسچ
قيم الرگاع من ديرة عفچ
گمت ما اميز الذيب امن الحمل
امنين ما التفت گلبي يشتعل
انه ما شايف شعب يتبع خبل
شاب راسي وتيهت كل السچچ
قيم الرگاع من ديرة عفچ
يا حكومتنه الرشيده ام الوقار
الفساد المالي عنوان الچ صار
ندري جابوكم ابدبابه وقطار
ليش ضليتوا سمچ ياكل سمچ
قيم الرگاع من ديرة عفچ
لازم انميز الزين امن الزلم
وننتخب كلمن شهم صاحب علم
ونرفض اللي يجي كل يوم ابفلم
من ايشوف المنصب اشويه اندرچ
قيم الرگاع من ديرة عفچ

هناك 7 تعليقات:

  1. ابن ديالى8‏/4‏/2018، 12:04 م

    عفوا من أين عرف الملا عبود ما هو ال (سنت)؟ لو نقص من راتبه سنت انعقج. تحياتي

    ردحذف
    الردود
    1. ملا عبود كان إنسان مثقف يجيد التكلم بالفارسية والتركية بطلاقة حيث وله إطلاع على ثقافات الشعوب كان أبوه تاجرا يصطحبه معه في اسفاره والسنت معروف لمن يمارس التجارة •• تحياتي

      حذف
    2. ملا عبود كان إنسان مثقف يجيد التكلم بالفارسية والتركية بطلاقة حيث وله إطلاع على ثقافات الشعوب كان أبوه تاجرا يصطحبه معه في اسفاره والسنت معروف لمن يمارس التجارة •• تحياتي

      حذف
  2. ههههههههه حلو اني عفجاوية وأول مره اسمع هاي القصة

    ردحذف
  3. تحيا الى قضاء عفج

    ردحذف

Blog Tips
Blog Tips
2009@ سوالف عراقية

اشترك معنا في سوالف عراقية